Chegou esta mañá do martes 18 de xullo a triste noticia do falecemento nas terras da illa de Tenerife de Martín Rodríguez Álvarez, o recoñecido debuxante tudense que tantas láminas da súa querida terra ten elaborado e popularizado.
Asinaba
en numerosas oportunidades como “Martín de Tuy”, lembrando a nosa cidade onde
nacera en 1938 e como tantos outros tudenses daqueles duros anos da posguerra
atopou na carreira militar, no seu caso na Armada, un camiño profesional que o
levou ata as terras das Illas Canarias, en concreto Santa Cruz de Tenerife,
onde desenvolveu a súa vida profesional e familiar. O pasado ano, no decurso da
súa última estadía en Tui o Concello tudense concedeulle un recoñecemento público
coa concesión dunha “Mención honorífica especial” pola súa actividade e traxectoria.
Con amigos e veciños que o acompañaron na entrega polo Concello da "Mención honrífica especial" o 9 de xuño de 2022 |
Editou
en Tui dous libros; por unha parte, “Tuy en blanco y negro” (1985) que recolle
unha ampla escolma das súas estampas tudenses, realizadas cunha depurada
técnica na plumiña e unha equilibrada composición. As súas imaxes son sempre
unha recreación persoal que partindo da realidade e as súas lembranzas recolle
unha visión dos diversos espazos e paisaxes tudenses cheas de sabor e plenamente
recoñecibles por calquera tudense ou coñecedor desta terra.
Mais
recentemente, no ano 2018, editou “Recuerdos de juventud” que recolle unha
ampla rememoración dos seus anos mozos, das súas amizades e vivencias... que
resulta de gran interese para achegármonos aos anos da década dos cincuenta en
Tui.
Mantivo
sempre unha intensa paixón por Tui, acrecentada pola súa condición de
emigrante, e que transmitiu a través da súa obra artística e os seus escritos,
moitos deles manuscritos cunha característica caligrafía, na que tamén
expresaba a súa habelencia artística. Tantos tudenses conservamos, con cariño,
as súas cartas e dedicatorias por esa artística escritura na que estaban
confeccionadas.
Neste
triste momento en que Martín Rodríguez parte desta terra nunha nova singradura
temos a fortuna de contar cunha ampla obra que garante que sigamos lembrando durante
moitos anos a Martín, pois as súas ilustracións forman parte xa da memoria
colectiva dos tudenses, que se identifican coas súas láminas que todos sentimos
como próximas e evocadoras da nosa terra.
Tamén
dedicou unha especial atención a recoller nos seus debuxos as terras de
Tenerife, as súas tradicións e moi especialmente a súa característica
arquitectura tradicional, que ten nos balcón de madeira tallada a súa mais
fermosa expresión.
Martín Rodríguez Álvarez forma parte xa da nómina de artistas tudenses que o longo dos tempos coa súa capacidade artística nos teñen enorgullecido como cidade e nos teñen enriquecido coa súa sensibilidade e competencia nas artes.
Comentarios
Publicar un comentario