Hai unhas semanas o amigo Carlos Pérez-Fonterosa, afervoado seguidor deste blog e a quen lle dedico este artigo, escribiume un whastapp reclamando que dende Tudensia nos ocupásemos da conmemoración do cuarto centenario da concesión por parte do Rei Filipe IV á nosa cidade do título de “Moi nobre e moi leal cidade” que segundo a información achegada foi o 13 de outubro do ano 1623. Celebrariamos por tanto estes días de outubro o catrocentos aniversario desta distinción honorífica.
A
condición de cidade de Tui figura xa na documentación medieval e asi no
documento do ano 1071 de Dona Urraca que concede diversas doazóns a
recentemente restaurada diocese tudense atopamos a expresión “Tudensis sedis
ipse episcopus... ipsam civitatem” e dende aquela todos privilexios
concedidos á Tui fan referencia a súa condición de cidade.
Como
afirma Pedro López: El concepto actual de ciudad hace referencia a una
población grande tanto por su extensión como por el número de sus
habitantes, pero esto no era así en el Antiguo Régimen, donde la
utilización del término ciudad se relacionaba con un determinado
estatus, que se alcanzaba por dos vías: la eclesiástica y la civil. La eclesiástica
señalaba en toda Europa los núcleos con sede episcopal, y en el caso español la
red episcopal española se organizó en la segunda mitad del siglo XVI, tras el
Concilio de Trento, y muy pocas ciudades aparecieron en los siglos posteriores
por esta vía, como Santander, en 1754. Por la vía civil se premiaban
determinados servicios, habitualmente de tipo militar, como ocurrió con
Fuenterrabía, en 1638. Pero ninguna de las dos vías alteraba sus
competencias jurisdiccionales, políticas o administrativas[1]
Queda
constatado como é a condición de sede episcopal a que lle outorga a Tui a
condición de cidade que manterá ata os nosos días, cunha permanencia de máis de
mil anos.
A
principal noticia que documenta esta designación á nosa cidade atopeina primeiro
nun breve artigo do investigador Aquilino González Santiso, que no libro
programa das festas de San Telmo de ano 1997,
escribe: fue Felipe IV quién, el 13 de octubre de 1623, oficializó el titulo al
concederles a las siete capitales del reino de Galicia la distinción de Muy
Nobles y Muy Leales ciudades[2].
A información non vai acompañada de referencia documental algunha que permita
unha verificación desta afirmación e a localización do documento desta
designación.
Como
sempre para afondar no coñecemento da nosa historia local cómpre consultar a
Francisco Avila y La Cueva que na súa monumental obra “Historia civil y
eclesiástica de la ciudad de Tuy y su diócesis” recolle o seguinte: El Rey
don Felipe 4º en 13 de octubre de 1623 concedió a las siete ciudades capitales
del Reyno de Galicia titulo de MUY NOBLES Y MUY LEALES espresando que
atendiendo á los muchos y grandes servicios hechos por los gallegos no podía
dejar de concederle dos votos de representación en Cortes en vez de uno que le
usurpaba la ciudad de Zamora[3].
Resulta
evidente que para Ávila y La Cueva esta distinción honorífica está ligada á
concesión de voto en Cortes ao reino de Galicia representado pola Xuntas do
Reino. O proceso de creación destas Xuntas non está clarificado. Non son un
órgano administrativo, nin xudicial senón unha “asemblea representativa”
e teñen como precedente as Xuntas da Irmandade conformadas cos procuradores das
principais cidades e vilas de Galicia nos tempos finais da Idade Media. Os
procuradores do Reino de Galicia se reúnen, primeiro, en representación das
cinco cidades cabeza de provincia que dende 1530 serán, finalmente, sete ao
separarse, en datas non coñecidas, tanto Coruña e Betanzos como Santiago e Tui,
creándose esta dúas novas cidades, Betanzos e Tui, como cabeceiras provinciais,
xunto a Santiago, Coruña, Lugo, Mondoñedo e Ourense.
O
proceso de institucionalización destas Xuntas culmina en 1621 cando votan un
servizo de 100.00 ducados para a escuadra de Galicia que abre as portas a que Felipe
IV lle conceda a Galicia, mediante unha Provisión de 13 de outubro de 1623, o
voto en Cortes (ata daquela representada pola cidade de Zamora). Este voto foi
concedido ao Reino de Galicia, a quen se lle asignan dous votos, que se
repartían entre as sete cidades cabezas de provincia, independentemente da súa
condición reguenga ou señorial. Ao ser sete establécese unha quenda que favorecía
a Santiago, que entraba na primeira e na última quenda; temporalización
recollida nunha Real Provisión de 5 de abril de 1625.
Cómpre
indicar que lamentablemente non se conserva a Real Provisión de 13 de outubro
de 1623, senón que o seu contido o coñecemos por que se reproduce na Provisión
sobre as quendas para a representación de Galicia en Cortes de 1625[4]. Neste documento non
figura mención algunha ao tratamento honorífico a conceder as sete cidades,
cabaceiras das provincias, que representarán ao Reino de Galicia con voto en
Cortes.
Pedro
López, que tampouco aporta o documento orixinario desta designación, apunta o
seguinte: Parece que el título de Muy Noble y Muy Leal ciudad quedaba
reservado para cada una de las siete capitales de las provincias menores
del Reino de Galicia: Coruña, Betanzos, Mondoñedo, Lugo, Ourense, Tui, y
Santiago[5]
Por
tanto, temos de procurar a confirmación deste uso protocolario na documentación
municipal tudense que se conserva. As actas capitulares do concello de Tui máis
antigas conservadas corresponden ao ano 1597 e nelas sempre se menciona “la
ciudad de Tuy” e con esta sinxela denominación figuran tantos os documentos
elaborados polo concello tudense como nas cartas e escritos dirixidos ao mesmo
nas primeiras décadas do século XVI.
Teremos
que agardar ata 1648 cando figure por vez primeira esta denominación no
encabeza do libro de acordos da cidade: Año de 1648. Libro de esta M. N. y
M. L. de Tuy”. O texto desta portadiña dos documentos é o seguinte:
Libro de
Aiuntamiento de esta M. N. Y M. L. Ciudad de Tuy, de el año de 1648, en
que se yncluien los autos de Aquerdo, y hordenes que se executaron eneste
presente año, por los Sres. Justicia y reximiento de dicha Ciudad.
Sr.
Juez, D. Lope de Espain y monte
Señores
Regidores
Don
Francisco de Caldas Vacelar
Don Juan
Teijeira de Zuñiga
Don
Diego Fernandez
Don
Fernando Fernando Ibañez Carvajal
Procurador
General, Sevastian de Lias
Escribano
Fernando Rodríguez
Estamos
por tanto a vinte cinco anos da suposta concesión deste privilexio que aínda
hoxe segue conservando a nosa cidade. Resulta evidente que non foi un proceso
inmediato a incorporación deste tratamento á documentación municipal. Tendo en
conta que as cuestións de protocolo naquel momento histórica tiñan unha
singular relevancia, como se pode constatar no proceso que leva a concesión do
voto en Cortes e á consolidación das Xuntas do Reino de Galicia[6], non parece lóxico que se
o privilexio dese tratamento honorífico foi concedido en 1623 o Concello tudense
demorase tanto tempo en empregar este tratamento que fortalecía a súa posición
de cabeceira provincial. Pero non é mais que unha hipótese da que carecemos de
apoio documental.
Sobre
este tema das distincións honoríficas da cidade tudense como estamos
comprobando é preciso afondar na investigación na documentación municipal ou
eclesiástica que poderá clarificar este proceso, pois ata agora como queda de
manifesto unicamente podemos constatar unha hipótese baseada na citas atopadas
na documentación.
Pero,
os títulos que acompañaban ao nome da nosa cidade non eran unicamente os de Moi
Nobre e Moi Leal, senón que nun traballo de grande interese do prestixioso
profesor e arquiveiro, Pedro López, sobre as festas que organiza o concello
tudense en 1732 pola reconquista da praza de Orán, no Norte de África figura o
seguinte documento: Relación puntual de las fiestas executadas por esta M.
N. Leal y Antigua Ciudad de Tuy, por la feliz milagrosa Restauracion de la
plaza de Orán y su castillo, a la obediencia de el Rey nuestro señor (Dios le
guarde) en este mes de Jullio de 1.732[7]
O
propio autor nos informa que este titulo de “Antiga” tamén foi empregado pola
cidade de Lugo, no ano 1746[8] e como no caso tudense
deixado de empregar do decurso do tempo. Outras cidades españolas como Toro,
Ávila ou Calahorra continúan na actualidade empregando esta titulación.
En
conclusión, dende o século XVII e paralelo a súa condición de capital da
provincia, con voto en Cortes como representación do Reino de Galicia, a cidade
de Tui ostenta este título honorífico de “Moi nobre e moi leal cidade”, pero sen
que poidamos establecer con precisión unha data concreta deste privilexio.
[1] López Gómez, Pedro: “Las relaciones de sucesos como tipología documental. La relación de las fiestas de Tui por la reconquista de Orán en 1732” en Boletín ANABAD. LXVIII (2018), Núm. 3-4, Julio-Diciembre, pp. 164-206.
[2] González
Santiso, Aquilino: “Tui, ciudad y no villa” en Tuy. Fiestas a San Telmo
patrón, 29 marzo – 7 abril, 1997.
[3] Avila y
La Cueva, Francisco: Historia civil y eclesiástica de la ciudad de Tuy y su
obispado. Tomo I: a cidade de
Tui e a súa terra. Edicion
facsimilar. Santiago, Consello da Cultura Galega, 1995, p. 407.
[4] Eiras
Roel, Antonio: “Las Juntas del Reino de Galicia: orígenes y proceso de
institucionalización” en Ohm : Obradoiro De Historia Moderna, (4) 1995. https://doi.org/10.15304/ohm.4.638
[5] López Gómez, Pedro: Op. Cit. p. 177.
[6] Euras
Roel, Antonio: Op. Cit.
[7] López Gómez, Pedro: Op. Cit. P. 177.
[8] López Pérez, Pedro: Op. Cit. p. 177-178.
Me satisfizo, me siento m'as ciudadano de ml CIUDAD.Enhorabuena y me uno a tu homenajeado. Desde Ferruxadas un saludo.
ResponderEliminar