O pasado martes, 15 de xuño, celebramos na Sala Municipal de Exposicións do Concello de Tui, a presentación do libro “Breve Historia de Tui”. Este acto contou coa participación de Cristóbal Ramírez, xornalista especialista en turismo e no Camiño de Santiago, José Ramón Fernández e Isilda Salvador, do Instituto de Estudios Tudenses e vinculados profesionalmente á Catedral de Tui e ao Núcleo Museolóxico de Valença respectivamente, e polo alcalde de Tui, Enrique Cabaleiro, xunto co autor.
A obra, editada por
Ediciones Accidentales e impresa por Gráfica Juvia de Tui, realiza unha visión
panorámica do devir histórico da cidade de Tui, procurando unha linguaxe
accesible a todos os públicos, co obxectivo de difundir a inmensa riqueza
histórica que atesoura esta cidade.
Existe
unha ampla bibliografía, se subliña na introdución do
libro, que estuda aspectos diversos da historia, da arte, das tradicións, do
patrimonio tudense, pero moi escasas obras que fagan un achegamento xeral á súa
historia. Este libro pretende encher ese oco na ampla produción de estudos e
investigacións sobre a nosa cidade.
Achego unha reportaxe
do desenvolvemento da presentación asi como as palabras que pronunciei no decurso
desta presentación.
Prezados
amigos
En
primeiro lugar, expresar a miña inmensa gratitude a todos os que estades
presentes neste acto de presentación desta “Breve historia de Tui”. A vosa asistencia
expresa, ante todo, a vosa amizade e a vosa xenerosidade cara a miña persoa,
pero expresa tamén o voso interese pola nosa cidade, pola súa historia; expresa
con rotundidade que falar da nosa historia, do noso pasado, da nosa traxectoria
común como comunidade non é unha mera diversión diletante dalgúns escollidos,
nin unha acción cultureta mais para autosatisfacción dunha elite intelectual...
En Tui
esa afirmación tan repetida de que “non podemos ser outra cousa que o noso
pasado e o coñecemento que nel adquirimos” ten plena vixencia. A vosa presenza demostra
que Tui é unha cidade de fondas raíces, de prolongados camiños que serpean por
séculos de vida común e compartida neste proxecto colectivo que é Tui. Os tudenses
sentimos esta construción histórica como propia, como nosa, como ese ruxe ruxe
do que non podemos, nen queremos, afastarnos, por que sabemos que esa é a nosa
riqueza, a nosa identidade. A vosa presenza nesta presentación reafirma este meu
convencemento.
Desculpas
por non nomear un por un a tantos amigos que hoxe asistides a esta
presentación. Gracias a todos por compartir este rato de calor. E gracias tamén
a todos os tudenses, de hoxe e do pasado, sen eles este libro non sería
posible, eles, vos, sodes os protagonistas desta obra, aos que este compilador
so quere dar voz, presencialidade, protagonismo.
Unha
gratitude que se concretiza nas persoas que me acompañan na mesa. A Cristobal
Ramírez, acreditado xornalista de La Voz de Galicia, animador incansable dos
camiños xacobeos, amigo entrañable que me ten aberto, nos poucos anos en que
levamos coñecidos, as portas xenerosas da súa amizade, e que traballou abondo,
xunto con Lalo Mayo, na preparación deste libro con entrega xenerosa que non
poderei pagarlles.
Amizade
e gratitude permanente, consolidada pola nosa común nacencia en San Bartolomeu
-e eso, me desculparan todos, marca un grao de condición tudense-, lle debo a
Jose Ramón Fernández, por compartir todos os seus moitos saberes sobre a
historia, a arte e as xentes de Tui e aconsellar e orientar, con tino e lucidez, a redacción
desta obra.
Agradecemento
tamén a amiga Isilda Salvador, valenciana das terras tudenses de Transmineo,
que me ensinou, tantas veces, a coñecer e amar a historia de Valença e a
superar a vella ponte da incomunicación que tantas veces afasta a ambas
ribeiras do Miño. Gracias Isilda polo teu saber e pola túa amizade.
Gracias
tamén ao noso Alcalde, Enrique Cabaleiro, por asistir a este acto, polas súas
esaxeradas palabras coas que me ruborizo e que se deben a súa xnerosidade pero
máis aló da súa digna condición persoal encarna, como alcalde, o obxectivo
deste libro, animado polos tudense e feito para os tudenses.
Gracias
a Juan Lima, con ese nome moitos non saberán a quen me refiro, a Juan de Juvia,
propietario de Gráficas Juvia... sen él este libro non seria posible, el ten
asumido a súa edición que poderemos compensarlle coa venda desta obra que non
recibiu financiamento público de ningunha institución u organismo, pois creo
que a sociedade civil ten capacidade dabondo sen precisar de continuo de axudas.
Juan Lima mantén o facho dunha alongada tradición de impresores tudenses, que se
prolonga dende hai xa dous séculos, cun traballo entregado e colaborativo, de
xa corenta anos con Gráficas Juvia... que lle ven seguro da súa infancia en
Santo Domingo.
E
gracias moi especialmente a miña familia, a Coral e os meus fillos. A eles
débolles o cariño e o tempo roubado para dedicarme a redacción desta obra e
tamén polo seu elevado espírito crítico que tanto axuda a concretizar os meus
escritos e moi especialmente esta obra.
Como
sinalo na introdución, esta obra débelle o seu valor so foi ás innumerables
achegas que tantos e tantos investigadores ao longo dos anos teñen aportado ao
coñecemento do noso pasado. Este libro se nutre das súas obras e a elas
remitimos para afondar no coñecemento do noso devir histórico.
É de
xustiza pois lembrar hoxe a historiadores como Francisco Avila y La Cueva,
Pascual Galindo Romero, Manuel Fernández-Valdés, José García Oro, Xosé María
Álvarez Blázquez, Ernesto Iglesias Almeida, Aquilino G. Santiso, Suso Vila,
Juan José Perles, Marta Cendón,Silvia González Soutelo Bieito Alonso e tantos e
tantos outros nomes sen esquecer aos compañeiros e amigos do Instituto de
Estudios Tudenses, varios deles aqui presentes. Sen eles non existiría esta
obra, pois deles recollemos e documentamos as nosas páxinas. Poucas cidades
como Tui poden gabarse de posuír unha nómina tan acreditada de estudosos que
tanto teñen contribuído ao coñecemento do noso acervo, do legado recibido dos
nosos devanceiros
Stefan
Zweig nunha das súas obras expresa coa habelencia da boa escritura o seguinte: os
libros se escriben para unir, por encima do propio alento, aos seres humanos.
Esta
breve historia de Tui quere unir, unirnos co noso pasado, revitalizar a nosa
memoria colectiva, asentar o orgullo de Tui, da súa historia, da achega dos
tudenses que nesta terra, dende hai miles de anos, teñen traballado, rido e
chorado, teñen amado e sentido; unha cidade que teñen construído coas súas
mans, co seu esforzo, ilusión e cobiza por un mundo mellor. Este libro pretende
que a nosa memoria sexa tamén como o granito da nosa cidade, permanente, e
contribuír a recuperar nomes como Martín Muñiz e Paio Martínez, Pedro Menéndez,
Fernando Soares e Pedro Pombo, lideres das revoltas medievais, ou Cándida
Rodríguez, Joaquin Estevez Besada ou Venancio González Romero, os mártires de
Sobredo, e tantos outros que agardan, ancorados no tempo, ser rescatados.
Nun fermosísimo
libro que acabo de ler, “El infinito en un junco” de Irene Vallejo, gañador do
Premio Nacional de Ensaio de 2020, Deixen este libro e lean esta marabillosa
obra sobre “a invención dos libros no mundo antigo” pero que fala da
actualidade. A autora na última paxina recolle unha cita dun poeta e viaxeiro,
o zaragozano Fernando Sanmartín: el pasado nos define, nos da una identidad,
nos empuja al psicoanálisis o al disfraz, a los narcóticos o al misticismo. Los
que somos lectores tenemos un pasado dentro de los libros. Para bien o para
mal.Un libro es siempre un mensaje”
E a
miña mensaxe é sinxela, simple, os tudenses non precisamos nin psiconalise, nin
mascaras (“mascaritas” dicimos en Tui), precisamos ollar ao noso pasado, ao
noso excepcional pasado, e sentírmonos orgullosos dos nosos devanceiros, dos
tudenses que nestes últimos dous milenios teñen creado co seu esforzo e
ilusión, cos seus acertos e erros, unha cidade excepcional, pero nin mais nin
menos que ningunha outra, dotada dunha traxectoria da que temos que considerarnos
como continuadores e custodios.
Pero
precisamos, como sociedade, unha pequena terapia, á que agardo este libro
contribúa: compre rachar co “bucle melancólico” no que vive comodamente
instalada unha boa porción da sociedade tudense, desbotar de nós ese continuo
laio sobre o que fomos e agora non somos, sobre as glorias pasadas, as decrépitas
vidas desta cidade levítica que diría Camilo Bargiela. O noso pasado non é un
motivo de lástimosa saudade ou de morriña paralizante, senón un alento de
esperanza, a testemuña da capacidade da sociedade tudense de se erguer de
continuo. Ollar á nosa historia, que se expresa especialmente noso patrimonio,
tanxible e intanxible, é comprobar que os tudenses fomos capaces, en medio de
guerras, dificultades, tiranías, opresións, etc de construír xuntos unha
fermosa cidade da que sentirnos orgullosos.
O
xeito como unha cidade lembra a súa historia – coas súas luces e sombras, coas
súas grandezas e miserias- reflicte como se percibe a si mesma e, moi
especialmente, como quere ser, qué proxecto común quere construír.
Este
libro non pretende ser unha rememoración que olla con nostalxia ao pasado senón
unha afirmación das capacidades de Tui e as súas xentes para reposicionarse,
para repensármonos como cidade.
A nosa
historia, o noso amplo patrimonio cultural non é unha pesada carga coa que
temos de resignarnos e tentar de liberarnos desa condena que impide o noso
desenvolvemento. Con este libro querería contribuír a demostrar que no noso
pasado está o noso presente e, moi especialmente, o noso futuro. Xa non somos
praza de guerra, capital provincial, cidade episcopal, nin centro comercial....
Funcións que ao longo do tempo desempeñou a nosa cidade. Hoxe gran riqueza de Tui é a nosa historia, o noso
patrimonio, asi como a nosa posición estratéxica no territorio do noroeste
peninsular de ponte entre Galicia e Portugal. Nunha axeitada e estratéxica
xestión do noso pasado, da nosa historia, da nosa situación no mapa, están as
oportunidade e as potencialidades de futuro de Tui, as novas industrias teñen
que ver co aproveitamento sustentable do noso acervo cultural, coa promoción
dun turismo diferenciado e de calidade (por que non Tui unha cidade slow?).
Este
libro se nutre tamén especialmente da querenza pola nosa cidade recibida da miña
familia e de tantos e tantos tudenses que, ao longo dos anos, ensináronme coas
súas palabras e actos a querer a unha cidade e unha terra chea de beleza, de
arte, de patrimonio, de vida... pero acostumada a permanecer silandeira,
agochada.... pois, tantas veces, por un maldito complexo, non somos quen de comunicar
o patrimonio tanxible e intanxible que nos singulariza e que expresa unha parte
da historia e do espírito non xa de Galicia senón da vella Gallaeciae que une
as terras do norte e o sur do río Miño. Agardo que coa axuda dos lectores desta
Breve Historia de Tui poidamos facelo entre todos. Moitas gracias
Comentarios
Publicar un comentario