Na rúa coengo Valiño - Tui
Hai algunhas datas se publicaban os datos
correspondentes ao pasado ano da presenza de peregrinos polo camiño portugués
que acadaban a significativa cifra de 25.628 peregrinos que percorreron esta
vía portuguesa, marcando un novo máximo, moi superior ao último ano santo por
poñer un exemplo. Deste xeito o camiño portugués se consolida como o segundo
itinerario de peregrinación, logo do camiño francés.
Amais a cidade de Tui se confirma, nun ano mais, como
o primeiro lugar de partida de peregrinos fóra do camiño procedente de Francia,
con 8436 peregrinos que escolleron a
cidade tudense para comezar a súa andaina cara ao sartego do apóstolo Santiago.
Estes datos permiten extraer varias conclusións e unha
consideración. Como conclusión, ante todo, a pervivencia, aínda que mellor
diriamos a progresión, da peregrinación como un fenómeno, en principio, cun
carácter relixioso ou espiritual indisociable, pero cunha dimensión cultural e
turística primordial. Pero tamén cómpre non esquecer a consideración da
peregrinación como un elemento patrimonial de primeiro orde, tanto polos
testemuños materiais que se conservan arredor do itinerario de peregrinación
como pola propia consideración dos peregrinos como elementos patrimoniais; sen
eles non existiría peregrinación, con eles a peregrinación é un patrimonio
vivo.
En segundo lugar, resalta a consolidación do camiño
portugués que transcorre historicamente polas cidades de Valença e Tui, con
mais de 25.000 peregrinos, fronte a pretendidas alternativas que abren novos
alternativas de peregrinación carentes dunha tradición histórica acreditada. Os
datos estatísticos abondan: non suman 200 os peregrinos que se achegaron a
Compostela dende o chamado “camiño portugués da costa”.
Como vimos apuntando o grande interese que suscita a
peregrinación deriva da consideración de reproducir un itinerario histórico,
revivindo unha experiencia de carácter histórico. Os valores patrimoniais e
naturais supoñen un gran valor que aos peregrinos suscítalles anovado interese.
Pero para quen ten realizado este camiño portugués, ou para aquel interesado
que se achegue a algún dos numerosos foros existentes sobre a peregrinación
xacobea, coñece como un dos momentos menos intensos ou interesantes do
itinerario portugués é unha parte da etapa entre Tui e Porriño, xustamente o treito
que discorre polo polígono industrial das Gándaras no municipio de Porriño. A
construción deste equipamento industrial deturpou dramaticamente non só un
espazo natural de grande interese ecolóxico senón os antigos camiños que dende
época romana percorreron os viaxeiros e tamén os peregrinos.
Na actualidade os peregrinos transitan por varios
quilómetros entre naves industrias que alteran de xeito substancial o contido
deste vieiro de peregrinación. Procurar unha alternativa que realizando este
percorrido cara ao oeste levase aos peregrinos por camiños menos alterados
resulta unha necesidade que beneficiaria a cantos percorren este camiño
portugués. Evidentemente, non estaríamos diante dun roteiro histórico pero
cómpre adaptarse as esixencias que derivan da presenza do polígono industrial,
informando desta alternativa que evitase este treito que altera a percepción da
peregrinación e o seu carácter.
A inmediata delimitación da camiño portugués é unha
oportunidade idónea para adecuar esta alternativa que partindo de Orbelle achéguese
ata Atios, recuperando nesta parroquia o itinerario actual por diante da
capeliña de Nosa Señora da Guía xa nas proximidades da vila de Porriño.
Dende “Tudensia” só pretendemos lembrar unha vella
reclamación de numerosos peregrinos e colectivos que en varias oportunidades
teñen promovido a creación deste camiño alternativo sen que ata o momento
chegase a concretarse definitivamente. A sinalización deste percorrido
alternativo suscitaría o agradecemento dos peregrinos que “sofren” o actual
trazado entre as naves industriais e o tráfico pesado que xeran e redundaría
nunha mellor imaxe deste roteiro cara a Compostela e na imaxe turística deste
camiño portugués.
Comentarios
Publicar un comentario